Til skamms tíma var talið að börn yrðu ekki þunglynd, enda getur þunglyndi haft aðrar birtingarmyndir hjá börnum en fullorðnum. Rannsóknir frá Bandaríkjunum benda til þess að rétt tæpt 1% barna á leikskólaaldri á við þunglyndi að stríða. Þegar kemur að skólaskyldualdri er rætt um að sú tala hækki um 1%. Það er svo ekki fyrr en við kynþroskaaldurinn sem þessi tala hækkar, verður 4,7%.

Ekki verður séð að það sé munur á þunglyndi milli kynja fram að kynþroska en þá verður greint þunglyndi algengara hjá stúlkum en strákum. Hafa ber þó í huga að birtingarmynd þunglyndis hjá ungmennum virðist vera önnur en hjá fullorðnum. Því getur verið að ógreint þunglyndi pilta komi fram í ýmiskonar hegðunarfrávikum.

Aukin tíðni þunglyndis hjá börnum undangengin ár getur átt sér nokkrar ástæður. Fagaðilar eru betur meðvitaðir um að börn geta einnig verið þjökuð af þunglyndi. Einnig getur verið að atriði eins og mataræði, fjölskyldugerð, aukin atvinnuþátttaka kvenna, borgarvæðingin, aukin firring og streita sem fylgir slíkri þróun séu þættir sem hafa áhrif.

Greining þunglyndis

• Depurð og leiði mestallan daginn, nánast á hverjum degi, að eigin mati eða annarra. Hjá börnum og unglingum kemur þetta frekar fram sem skapstyggð eða pirringur.
• Áhuga- og ánægjuleysi í flestum daglegum athöfnum. Fólk hættir að sinna áhugamálum sem áður þóttu skemmtileg, dregur sig út úr félagslega.
• Breytingar á holdafari eða matarlyst.
• Þreyta eða orkuleysi nánast daglega.
• Breyting á svefni, of lítill eða of mikill svefn.
• Tregða til að hreyfa sig eða óróleiki.
• Að finnast maður vera einskis virði. 
• Óraunhæf sektarkennd og/eða svartsýni, vonleysi. 
• Minni einbeiting eða erfiðleikar við að taka ákvarðanir, nánast daglega. 
• Endurteknar sjálfsvígs- eða dauðahugsanir.